តើពាក្យ «ប្រឹថពី» មានន័យដូចម្ដេច ?

ប្រឹថពី

👉ថ្នាក់ពាក្យជា នាមសព្ទ
មានន័យថា (សំ ប្ឫថវី, ប្ឫថិវិ, ប្ឫថ្វី, ប្ឬ > ប្រឹ; បា. បឋវី ) ផែនដី, ផ្ទៃដីទាំងមូល, មណ្ឌលដី ។ ក្រឡាប្រឹថពី ឬ ក្រឡាមហាប្រឹថពី ក្រឡាផ្ទៃប្រឹថពីទាំងមូល ។ ប្រឹថពីកម្បនាទ ( —ក័ម-ប៉ៈន៉ាត ) ការញ័រប្រឹថពី ។ ប្រឹថពីចលនា ( —ចៈលៈន៉ា ) ការកម្រើកឬរញ្ជួយប្រឹថពី ។ ប្រឹថពីតល ( —ដល់ ) ផ្ទៃនៃប្រឹថពី ។ ប្រឹថពីភូបាល លោកអ្នកគ្រប់គ្រងផែនដី ( ព្រះរាជា ) ។ ល ។ ( លោក-អ្នកខ្លះធ្លាប់សរសេរ ប្រថពី គួរសរសេរ ប្រឹថពី តាមបែបបុរាណវិញ ទាំងត្រឹមត្រង់តាមប្រភពនៃពាក្យផង ) ។ ប្រឹថពី និង បឋវី ទាំង ២ នេះជាវេវចនៈនឹងគ្នា តាមតែប្រើសព្ទណាក៏បាន ។ សព្ទថា ដី ឬ ផែនដី នេះមានវេវចនៈច្រើន ដូចជា ធរណី, មហី, មេទនី, វសុន្ទរី, ពសុធា ជាដើម ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត