លោកមហាសេដ្ឋី Alexander Mamut ជាមេធាវី និងជាអ្នកគ្រប់គ្រងធនាគារ និងជាអ្នកវិនិយោគិន

លោក Alexander Leonidovich Mamut កើតនៅថ្ងៃទី ២៩ ខែ​ មករា ឆ្នាំ ១៩៦០ គាត់គឺជាមេធាវី និងជាអ្នកគ្រប់គ្រងធនាគា និងជាអ្នកវិនិយោគិន។ នៅក្នុងបញ្ជី Forbes របស់មហាសេដ្ឋីពិភពលោកឆ្នាំ ២០១៦ គាត់ត្រូវបានជាប់ចំណាត់ថ្នាក់លេខ ៧២២ ជាមួយនឹងទ្រព្យសម្បត្តិសុទ្ធចំនួនប្រមាណ ២,៤ ពាន់លានដុល្លារអាមេរិក។

ជីវិតដំបូង៖

ឪពុករបស់គាត់គឺលោក Leonid Solomonovich Mamut ជាវេជ្ជបណ្ឌិត និងជាមេធាវី​ និងជាអ្នកនិពន្ធម្នាក់នៃរដ្ឋធម្មនុញ្ញរុស្ស៊ីនឹងម្តាយរបស់គាត់គឺលោកស្រី Cicilia Ludwigovna ដែលជាមេធាវីការពារក្តី។ នៅឆ្នាំ ១៩៧៧ លោក Alexander បានបញ្ចប់ការសិក្សាផ្នែកកាយសម្ព័ន្ធនៅ Moscow ឆ្នាំ ១៩៨២ និងបានបញ្ចប់ការសិក្សាពីសាកលវិទ្យាល័យនៅ Moscow មហាវិទ្យាល័យផ្នែកច្បាប់។

អាជីព៖

លោក Alexander បានចាប់ផ្តើមអាជីពរបស់គាត់ជាមេធាវី។ នៅឆ្នាំ ១៩៩០ រួមជាមួយលោក Andrey Gloriozonov។ លោក Alexander បានបង្កើតធនាគារ“ ធុរកិច្ច និងសហប្រតិបត្តិការ” ដែលត្រូវបានប្តូរឈ្មោះក្នុងឆ្នាំ ១៩៩១ ទៅជាធនាគារពាណិជ្ជកម្ម “Imperial” ។ ធនាគារនេះត្រូវបានបង្កើតឡើងសម្រាប់ក្រុមហ៊ុនសេវាកម្មក្នុងវិស័យប្រេង និងថាមពល។

អតិថិជនធំបំផុតរបស់ខ្លួនគឺ“ Gazprom” និង“ Lukoil” ។ ក្នុងឆ្នាំ ១៩៩០ លោក Alexander បានបង្កើតក្រុមហ៊ុនច្បាប់ប្រឹក្សាយោបល់អំពី “ALM-Consulting” និងបានបម្រើការជាដៃគូគ្រប់គ្រងនៅទីនោះពេញមួយឆ្នាំ ១៩៩០-១៩៩៣ ។ គាត់បានបង្កើតក្រុមហ៊ុនហិរញ្ញប្បទានគម្រោងក្នុងឆ្នាំ ១៩៩៣ និងបានបម្រើការជានាយកប្រតិបត្តិរហូតដល់ឆ្នាំ ១៩៩៨។

ទន្ទឹមនឹងនេះដែរគាត់ជាសហស្ថាបនិក និងជានាយក Sedmoy Continent ពីឆ្នាំ ១៩៩៣ ដល់ឆ្នាំ ១៩៩៧ ។ គាត់គឺជាស្ថាបនិកក្រុមហ៊ុន ALM Development ហើយនៅតែជាអ្នកវិនិយោគរហូតដល់ឆ្នាំ ២០០១ ។លោក Alexander បានបម្រើការងារជាប្រធានក្រុមហ៊ុនពាណិជ្ជកម្មម៉ូស្គូ (MDM-Bank) ពីឆ្នាំ ១៩៩៩ ដល់ឆ្នាំ ២០០២។

គាត់បានបង្កើតក្រុមហ៊ុន SUP ក្នុងឆ្នាំ ២០០៦ និងបានទិញ LiveJournal ពីប្រទេសរុស្ស៊ីក្នុងឆ្នាំ ២០០៧។ នៅឆ្នាំនោះគាត់ក៏បានបង្កើតភោជនីយដ្ឋាន និងក្លឹបជាច្រើន។ ក្រុមហ៊ុនវិនិយោគ  “A&NN” របស់គាត់ដែលបានទិញភាគហ៊ុន ១០០ ភាគរយរបស់ Evroset ពី Evgeniy Chichvarkin និង Timur Artemiev ក្នុងឆ្នាំ ២០០៨។ គិតត្រឹមខែ​ តុលា ឆ្នាំ ២០០៨ គាត់បានលក់ភាគហ៊ុន ៤៩,៩% ទៅឱ្យក្រុមហ៊ុន VimpelCom ។

ទន្ទឹមនឹងនេះដែរគាត់បានទិញមហោស្រពភាពយន្ត “Pioneer” និងជួសជុលវាឡើងវិញ។លោក Alexander បានទិញយក Spar Moscow Holding ៦០% ក្នុងឆ្នាំ ២០០៩។ គាត់ក៏បានទិញក្លឹបបាល់ទាត់ “Torpedo-ZIL” សម្រាប់តម្លៃនិមិត្តរូប ១ ដុល្លារ។ ពីរឆ្នាំក្រោយមកគឺនៅឆ្នាំ ២០១១ គាត់បានវិនិយោគនៅក្នុង Nomos-Bank ។ នៅខែ​ ឧសភា ឆ្នាំ ២០១១ គាត់បានទិញ Waterstones ដែលជាបណ្តាញហាងលក់សៀវភៅដែលមានមូលដ្ឋាននៅចក្រភពអង់គ្លេសតាមរយៈក្រុមហ៊ុន Capital Fund Management Limited ដែលជាក្រុមហ៊ុនសម្ព័ន្ធរបស់ក្រុមហ៊ុន A&NN របស់គាត់។

គាត់គឺជាអ្នកវិនិយោគិនដ៏ធំមួយនៅ Ingosstrakh ដែលជាក្រុមហ៊ុនធានារ៉ាប់រង និង Troika-Dialog ដែលជាធនាគារវិនិយោគ។ គាត់ក៏បានវិនិយោគនៅក្នុងក្រុមហ៊ុន Polymetal International ដែលជាក្រុមហ៊ុនរុករករ៉ែ និងក្រុមហ៊ុន PIK Group ដែលជាក្រុមហ៊ុនសាងសង់។ គាត់បានក្លាយជាម្ចាស់ផ្តាច់មុខនៃប្រព័ន្ធផ្សព្វផ្សាយព័ត៌មាន  SUP Media កាលពីខែ ធ្នូ ឆ្នាំ ២០១២។ ហើយនៅឆ្នាំ ២០១៤ គាត់បានក្លាយជាប្រធានក្រុមហ៊ុន Rambler & Co ។ គាត់ក៏ជាម្ចាស់គេហទំព័រ Lenta.ru ដែលជាគេហទំព័រព័ត៌មាន។

ប្រភព៖ Phnom Penh HR