តើពាក្យ «ម្រុម» មានន័យដូចម្ដេច ?

ម្រុម

👉ថ្នាក់ពាក្យជា នាមសព្ទ
មានន័យថា ( ឥណ្ឌា មរុម ) ឈ្មោះឈើមួយប្រភេទ មែកស្រួយងាយបាក់ ជាជាតិឈើចាញ់ទឹក, ស្លឹកខ្ចីប្រើជាបន្លែស្លស្រឡក់ ផ្លែវែងៗ សាច់រឹងមានសរសៃ ប្រើជាបន្លែស្លម្ជូរបាន ( សរសេរ ម្រុំ ក៏បាន ) ។
ឈ្មោះចុល្លព្រឹក្ស ឬព្រឹក្សតូចមួយប្រភេទកម្ពស់ ៣-១០ ម មានដើមកំណើតក្នុងប្រទេសឥណ្ឌា ឬ​ប៉ាគ្សីតង់ គេនាំមកដាំនៅទ្វីបអាស៊ីអាគ្នេយ៍ ស្លឹក ផ្កា និងផ្លែខ្ចី ប្រើធ្វើបន្លែបាន (ស្លឹកខ្ចីប្រើស្លស្រឡក់ ផ្លែវែងៗមានសរសៃប្រើជាបន្លែស្លម្ជូរ ) ។ ស្លឹកចាស់ ឬ​ខ្ចី អាចឲ្យគោ ក្របីស៊ីបាន ។ គ្រាប់ផ្លែម្រុម គេអាចចម្រាញ់យកប្រេង ម៉្យាងបរិភោគបាន និងប្រើដាក់ ទឹកអប់ដើម្បីឲ្យក្លិនក្រអូបនៅជាប់មិនប្រែ​។ គ្រូបុរាណ ប្រើសម្បកធ្វើជាថ្នាំកម្លាំងសំរាប់នារីទើបសំរាលកូនហើយ ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត