តើពាក្យ «រៀល» មានន័យដូចម្ដេច ?

រៀល

👉ថ្នាក់ពាក្យជា កិរិយាសព្ទ
មានន័យថា ភ្លាត់កៃ, ភ្លាត់គន្លឹះ, ជ្រុលរអិលទៅ ។
ឧទាហរណ៍៖ កៃកាំភ្លើងរៀល ។

👉ថ្នាក់ពាក្យជា នាមសព្ទ
មានន័យថា ( ស. ហ្រ្យើញ ឬ ហ្រ្យេញ អ. ថ. ហ្រៀន; ល. ហ្យ្លន អ. ថ. ហ្លៀន; សំ. ហិរណ្យ; បា. ហិរញ្ញ “ប្រាក់; មាសប្រាក់; ទ្រព្យ” ) ប្រាក់សណ្ឋានមូលសំប៉ែត មានរូបនិងអក្សរជាសម្គាល់ បោះសម្រាប់ប្រើចាយក្នុងនានាប្រទេស មានតម្លៃឡើងចុះមិនទៀង; ប៉ុន្តែក្នុងប្រទេសឥណ្ឌូចិនមានតម្លៃ ១០០ សេនជាកំណត់។
ឧទាហរណ៍៖ ប្រាក់រៀល, អាវនេះថ្លៃ ៥ រៀល ។

                      សូម្បីធនបត្រតម្លៃ ១០០ សេន ដែលប្រើចាយជាជំនួសសាច់ប្រាក់ក្នុងសម័យនេះ ក៏ហៅថា រៀល ដែរ ។

ឧទាហរណ៍៖ ធនបត្រ ១ រៀល, ធនបត្រ ៥ រៀល ។

                      ឈ្មោះត្រីស្រកាមួយប្រភេទ មាត្រតូចសម្បុរ-ស រាងខ្លីសំប៉ាត ជាពួកត្រីលេញ។

ឧទាហរណ៍៖ ផ្អកត្រីរៀល ។

👉ថ្នាក់ពាក្យជា គុណនាម
មានន័យថា ដែលមានចួនរណ្ដំពីមួយទៅមួយតៗគ្នារាល់ឃ្លា ។
ឧទាហរណ៍៖ ពាក្យរៀល, ដូចជា : ចេះមិនឈ្នះចង់, ត្រង់មិនឈ្នះទាល់, កលមិនឈ្នះគិត, ឫទ្ធិមិនឈ្នះរោគ, លោកមិនឈ្នះលាញ, ទាញមិនឈ្នះទៅ, នៅមិនឈ្នះនាង, រាងមិនឈ្នះរាគ, លាកមិនឈ្នះលោភ, ល្មោភមិនចេះល្មម, ព្រមមិនឈ្នះព្រេង ( ពាក្យឲកញ៉ាសុត្តន្តប្រីជា អិន បាត់ដំបង; មានអត្ថន័យរាក់ៗដែរទេ ) ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត