តើពាក្យ «លេច» មានន័យដូចម្ដេច ?

លេច

👉ថ្នាក់ពាក្យជា កិរិយាសព្ទ
មានន័យថា ចេញ​ពី​ទី​កំបាំង ។
ឧទាហរណ៍៖ ស្រាប់​តែ​ឃើញ​លេច​ប្លឹម​ពី​ក្នុង​ព្រៃ​មក។

                       ជ្រាប​ហូរ​ចេញ ។
ឧទាហរណ៍៖ ទឹក​លេច​ពី​ភ្លឺ​ស្រែ។

                       លៀន​ចេញ​ ឬ​ទុល​ចេញ ។
ឧទាហរណ៍៖ គ្រាប់​ឈើ​ដុះ​លេច​ពន្លក​ពី​ក្នុង​ដី។

                      ធ្លាយ​ឬ​លាន់​ចេញ ផ្សាយ​ចេញ ។
ឧទាហរណ៍៖ លេច​សម្ដី លេច​ដំណឹង ។

                     បង្ហាញ​មុខ ​ឬ​ចេញ​មុខ​ឲ្យ​ឃើញ ។
ឧទាហរណ៍៖ ចុះ​ទើប​នឹង​លេច​មុខ​មក​ពី​ណា​ហ្នឹង ? (ព. ស្ន.)

                     ដើរ​លេច​វាល​ចូល​ព្រៃ លេច​ព្រៃ​ចូល​វាល ដើរ​ផុត​ពី​ទី​វាល​ចូល​ក្នុង​ព្រៃ ចេញ​ពី​ព្រៃ​ចូល​ក្នុង​វាល​ទៀត ។ លេចឮ លេច​ដំណឹង​ឮ​ដល់ ។ល។ ព. ទ. បុ. លេច​ទឹក​លេច​ត្រី ការ​កំបាំង​តែ​ហើប​ចេញ ឮ​ដល់​មនុស្ស​ម្នាក់​ហើយ ច្រើន​តែ​លេច​ឮ​ត​ទៅ​ទៀត (ស្រដៀង​គ្នា​នឹង ក្អែក​មួយ​ជា​ក្អែក​ដប់ ដែរ) ។

👉ថ្នាក់ពាក្យជា នាមសព្ទ
មានន័យថា ឈ្មោះ​ដំបៅ​មួយ​ប្រភេទ កើត​នៅ​បាត​ជើង ឬ​កែង​ជើង​លៀន​សាច់​រឹង​ចេញ​មក។

ឧទាហរណ៍៖ កើត​ដំបៅ​លេច ។

👉ថ្នាក់ពាក្យជា គុណនាម
មានន័យថា ដែល​មិន​គត់។
ឧទាហរណ៍៖ ក្អម​លេច ផ្ទះ​លេច ការុង​លេច ។

                      ព. ប្រ. មាត់​លេច មាត់​រអិល​ចេះ​តែ​ធ្លាយ​សម្ដី​ចេញ​ទៅ​ទប់​មិន​ទាន់។
ឧទាហរណ៍៖ មនុស្ស​មាត់​លេច (និយាយ​ថា មាត់​ដាច ក៏​បាន) ។