តើពាក្យ «វិនិច្ឆយ» មានន័យដូចម្ដេច ?

វិនិច្ឆយ

👉ថ្នាក់ពាក្យជា នាមសព្ទ
មានន័យថា ( បា. វិនិច្ឆយ; សំ. វិនិឝ្ចយ ) ការពិចារណាដោយល្អិត, ការពិនិត្យមើលឲ្យឃើញពិត; ដំណើរកាត់សង្ស័យ, ការរម្លីងសេចក្ដីឲ្យអស់សង្ស័យ; ការជំនុំជម្រះសេចក្ដី, ការកាត់សេចក្ដី ។ ខ្មែរច្រើនប្រើជា កិ. “ជំនុំជម្រះអធិករណ៍, ជម្រះក្ដី, កាត់ក្ដី” ។
ឧទាហរណ៍៖ ចៅក្រមវិនិច្ឆ័យសេចក្ដីតាមមាត្រាច្បាប់ ។

                      វិនិច្ឆយដ្ឋាន; វិនិច្ឆយសភា ឬ –សាលា សាលាជម្រះក្ដី, សាលាជំនុំក្ដី ។ វិនិច្ឆយធម៌ ធម៌សម្រាប់វិនិច្ឆ័យ, ច្បាប់សម្រាប់ជំនុំជម្រះកាត់ក្ដី ។ វិនិច្ឆយមហាមាត្យ ( –ម៉ាត; បា. វិនិច្ឆយ + មហា + អមត្ត > វិនិច្ឆយមហាមត្ត; សំ. វិនិឝ្ចយ + មហត៑ + អមាត្យ ) អមាត្យធំអ្នកសម្រេចការជំនុំក្ដី, សេនាបតី ឬរដ្ឋមន្ត្រីក្រសួងនគរបាល ។ វិនិច្ឆយាមាត្យ ( –យ៉ាម៉ាត; បា. វិនិច្ឆយ + អមច្ច > វិនិច្ឆយាមច្ច; សំ. វិនិឝ្ចយ+ អមាត្យ > វិនិឝ្ចយាមាត្យ ) អមាត្យអ្នកជម្រះក្ដី ( ចៅក្រម) ។ ល ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត