លោកមហាសេដ្ឋី Andrew Forrest ជាអតីតនាយកប្រតិបត្តិរបស់ក្រុមហ៊ុន Fortescue Metals Group

លោក John Andrew Henry Forrest កើតនៅឆ្នាំ ១៩៦១ ដែលជាពាណិជ្ជករ និងជាសប្បុរសជនអូស្រ្តាលី ។ គាត់ត្រូវបានគេស្គាល់ថាជាអតីតនាយកប្រតិបត្តិរបស់ក្រុមហ៊ុន Fortescue Metals Group (FMG) ។ ហើយគាត់ក៏មានចំណាប់អារម្មណ៍ផ្សេងទៀតនៅក្នុងឧស្សាហកម្មរ៉ែ និងកន្លែងចិញ្ចឹមសត្វគោផងដែរ ។

លោក​ Andrew មានទ្រព្យសម្បត្តិសុទ្ធចំនួន ៣,៣៣ ពាន់លានដុល្លារអូស្រ្តាលីគិតត្រឹមឆ្នាំ ២០១៦ ។ គាត់បានជាប់ចំណាត់ថ្នាក់នៅក្នុងប្រទេសអូស្រ្តាលីដែលជាអ្នកមានជាងគេបំផុតទាំង ១០ ផងដែរ ។ គាត់គឺជាអ្នកមានជាងគេបំផុតនៅក្នុងប្រទេសអូស្រ្តាលីក្នុងឆ្នាំ ២០០៨ ។ ក្នុងឆ្នាំ ២០១៣ លោក​ Andrew និងភរិយារបស់គាត់គឺលោកស្រី Nicola គឺជាប្រជាជនអូស្ត្រាលីដំបូងគេដែលបានផ្តល់ទ្រព្យសម្បត្តិភាគច្រើនរបស់ពួកគេដល់សក្មភាពសមនុស្សធម៌ ។

ហើយក្រោយមកគាត់បានលាឈប់ពីតំណែងជានាយកប្រតិបត្តិរបស់ក្រុមហ៊ុន Fortescue Metals ក្នុងឆ្នាំ ២០១១ ដើម្បីចំណាយពេលច្រើនលើការងារសប្បុរសធម៌ ។ ហើយភាគច្រើននៃសប្បុរសធម៌របស់គាត់បានឆ្លងកាត់ទាំងមូលនិធិ Minderoo ដោយបានផ្តោតលើការអប់រំ និងជនជាតិដើមអូស្រ្តាលីឬមូលនិធិ Walk Free ដោយបានផ្តោតលើការបញ្ចប់ទាសភាពសម័យទំនើបដែលពួកគេទាំងពីរបានបង្កើតឡើង ។

ក្នុងឆ្នាំ ២០១៤ លោក​ Andrew និងភរិយារបស់គាត់គឺលោកស្រី Nicola បានសន្យាថានឹងផ្តល់ថវិកាចំនួន ៦៥ លានដុល្លារក្នុងរយៈពេល ១០ ឆ្នាំតាមរយៈមូលនិធិ Minderoo ដោយបានបង្កើតមូលនិធិស្រាវជ្រាវ Forrest ដើម្បីផ្តល់អាហារូបករណ៍ដល់ថ្នាក់បណ្ឌិតដល់និស្សិតដែលកំពុងសិក្សាថ្នាក់បណ្ឌិតនៅសាកលវិទ្យាល័យអូស្រ្តាលីខាងលិច ។

ជីវិតដំបូង៖

លោក​ Andrew កើតនៅទីក្រុង Perth នៅភាគខាងលិចអូស្ត្រាលី ។ ​គាត់គឺជាកូនពៅម្នាក់ក្នុងចំណោមបងប្អូនបីនាក់របស់លោកស្រី Judith (née Fry) និងលោក Donald Forrest ។ លោក​ Andrew បានសិក្សានៅឯសាកលវិទ្យាល័យអូស្រ្តាលីខាងលិចជាកន្លែងដែលគាត់សិក្សាផ្នែកសេដ្ឋកិច្ច និងនយោបាយ។

ប្រភព៖ Phnom Penh HR