លោកមហាសេដ្ឋី Binod Chaudhary ជាប្រធានក្រុមហ៊ុន Chaudhary Group (CG)

លោក Binod Chaudhary កើតនៅថ្ងៃទី ១៤ ខែ មេសា ឆ្នាំ ១៩៥៥ ដែលជាអ្នកជំនួញជនជាតិនេប៉ាល់ និងសប្បុរសជន ។ បច្ចុប្បន្ននេះគាត់គឺជាប្រធានក្រុមហ៊ុន Chaudhary Group (CG) ដែលមានក្រុមហ៊ុនជិត ៨០ ។ គាត់ក៏ជាមហាសេដ្ឋីនេប៉ាល់ដំបូងគេដែលត្រូវបានចុះនៅក្នុងបញ្ជីឈ្មោះមហាសេដ្ឋីពិភពលោកដោយ Forbes ។

គាត់បានចូលរួមនៅក្នុងវិស័យរដ្ឋាភិបាលនិងសង្គមផ្សេងៗទៀតជាច្រើន ។ ហើយគាត់ក៏ជាជាសមាជិកម្នាក់នៃសភាធម្មនុញ្ញ និងសភានៃប្រទេសនេប៉ាល់ចាប់ពីខែ មេសា ឆ្នាំ ២០០៨ ដល់ខែ ឧសភា ឆ្នាំ ២០១២ ។ មូលនិធិ CG របស់គាត់បានធ្វើការដើម្បីសុខុមាលភាពសង្គមហើយគាត់តែងតែចូលរួមក្នុងផ្នែកសិល្បៈតន្ត្រី និងជួយអក្សរសាស្ត្រផងដែរ ។

ជីវិតដំបូង និងការអប់រំ៖

លោក Binod កើតនៅទីក្រុង Kathmandu ប្រទេសនេប៉ាល់ ។ គាត់គឺជាកូនប្រុសរបស់លោក Lunkaran Das និងលោកស្រី Ganga Devi Chaudhary ។ គាត់បានធំទ្បើងនៅទីក្រុង Kathmandu ជាមួយបងប្អូនប្រុសពីរនាក់របស់គាត់ឈ្មោះ Arun និង Basant Chaudhary ។ ជីតារបស់គាត់គឺជាពាណិជ្ជករវាយនភ័ណ្ឌ និងជាម្ចាស់ហាងវាយនភ័ណ្ឌ ។

លោក Binod បានផ្លាស់ប្តូរហាងទៅជាក្រុមហ៊ុនធំមួយដែលជាសាជីវកម្មដ៏ធំបំផុតមួយនៅក្នុងប្រទេសនេប៉ាល់ ។ គាត់បានចាកចេញពីការសិក្សារបស់គាត់ហើយបានចាប់ផ្តើមរកស៊ីតាំងពីអាយុ ១៨ ឆ្នាំនៅពេលឪពុកគាត់មានជំងឺបេះដូង ។ លោក Binod បានរៀបការជាមួយ Sarika ហើយពួកគេមានកូនបីនាក់ ។

អាជីវកម្ម និងឧស្សាហកម្ម៖

លោក Binod តែងតែមានក្តីស្រមៃចង់ក្លាយជាអ្នកឧស្សាហកម្មធំម្នាក់នៅប្រទេសនេប៉ាល់​ ។ ជាមួយនឹងការខិតខំប្រឹងប្រែងអស់រយៈពេលជាង ៤ ទសវត្សបន្តមកគាត់កំពុងរស់នៅក្នុងក្តីសុបិនរបស់គាត់នៅពេលដែលគាត់បានបង្កើតក្រុមហ៊ុន Chaudhary ទៅជាក្រុមហ៊ុនដ៏ធំបំផុតនៅក្នុងប្រទេសនេប៉ាល់ដែលមានតម្លៃរាប់ពាន់លានដុល្លារ ។ នេះបើយោងតាមរយះទស្សនាវដ្តី Forbes បានឲ្យដឹងថាគាត់ត្រូវចាត់ចូលទៅក្នុងចុះបញ្ជីឈ្មោះមហាសេដ្ឋីពិភពលោកក្នុងឆ្នាំ ២០១៤ ហើយគាត់គឺជាអ្នកមានជាងគេបំផុតទី ១.៤៦០ នាក់នៅលើពិភពលោក ។

សព្វថ្ងៃនេះក្រុមហ៊ុន Chaudhary Group (CG) ជាសហគ្រាសឆ្លងប្រទេសដែលមានក្រុមហ៊ុនជិត ៨០ ដែលលាតសន្ធឹងលើទ្វីបចំនួន ៥ ។ ហើយវាមានយីហោជាង ៦០ នៅក្នុងប្រទេសចំនួន ៣០ ដែលមាននិយោជិកជាង ៦០០០ នាក់ ។ ក្នុងចំណោមម៉ាកយីហោរបស់ក្រុមហ៊ុនផលិតមីកញ្ចប់ ‘Wai Wai’ គឺជាអាជីវកម្មមួយដែលទទួលបានជោគជ័យបំផុត ។ ហើយយីហោនេះវាផលិតបានគុយទាវជាងមួយពាន់លានកញ្ចប់ជារៀងរាល់ឆ្នាំហើយត្រូវបានលក់ដាច់ជាង ៣៥ ប្រទេសនៅទូទាំងពិភពលោក ។

ចំណាប់អារម្មណ៍គួរឱ្យកត់សម្គាល់ផ្សេងទៀតរបស់ក្រុមហ៊ុនគឺផ្នែកហិរញ្ញវត្ថុ ធនាគារ ស៊ីម៉ងត៍ អចលនទ្រព្យ សណ្ឋាគារ អេឡិចត្រូនិក និងឧបករណ៍ប្រើប្រាស់នៅក្នុងផ្ទះបាយ និងវិស័យការអប់រំ ថាមពលជីវឧស្ម័ន ។ លោក Binod បានថ្លែងជាសាធារណៈថាភាគច្រើននៃជោគជ័យរបស់គាត់ក្នុងការធ្វើជំនួញនៅក្នុងប្រទេសនេប៉ាល់បានមកពីសមត្ថភាពរបស់គាត់ក្នុងការទំនាក់ទំនងជាមួយមនុស្សត្រឹមត្រូវ ។

ប្រភព៖​ Phnom Penh HR