តើពាក្យ «ខាទនីយាហារ» មានន័យដូចម្ដេច ?

ខាទនីយាហារ

?ថ្នាក់ពាក្យជា នាមសព្ទ
មានន័យថា (បា.) អាហារ​សម្រាប់​ទំពា (ពួក​បង្អែម ឬចំណី)  ។
ឧទាហរណ៍៖ ផ្លែ​ឈើ​មាន​ផ្លែ​ស្វាយ​ជាដើម ជា​ខាទនីយាហារ ។

           បា. (ន.) < ខាទនីយ + អាហារ ។ វិ. ខាទនីយោ អាហារោ > ខាទនីយាហារោ អាហារដែលគេគប្បីទំពាស៊ី ឈ្មោះថាខាទនីយាហារ បានដល់ អាហារសម្រាប់ទំពា (ពួកបង្អែមឬចំណី) ផ្លែឈើមានផ្លៃស្វាយជាដើម ជាខាទនីយាហារ ។ ក្នុងគម្ពីរវិនយបិដក មហាវិភង្គ ត្រង់បទភាជនីយ នៃវិកាលភោជនសិក្ខាបទ (បិ.៤/១៣២) សម្តែងថា ខាទនីយំ នាម បញ្ច ភោជនានិ យាមកាលិកំ សត្តាហកាលិកំ យាវជីវិកំ ឋបេត្វា អវសេសំ ខាទនីយំ នាម ។ ដែលហៅថា ខាទនីយៈនោះ បានដល់របស់ទាំងអស់ វៀរលែងតែភោជន ៥ យ៉ាង និងវត្ថុជាយាមកាលិក សត្តាហកាលិក និងយាវជីវិក ចេញ ហៅថា ខាទនីយៈ ។ ភោជនីយំ នាម បញ្ច ភោជនានិ ឱទនោ កុម្មាសោ សត្តុ មច្ឆោ មំសំ ។ ដែលហៅថា ភោជនីយៈ បានដល់ភោជន ៥ យ៉ាងគឺ បាយ នំស្រស់ នំក្រៀម ត្រី សាច់ ។ ខាទនីយៈនោះឯង ហៅថា ខាទនីយាហារ, ភោជនីយៈនោះឯងហៅថា ភោជនីយាហារ ។ (ម.ព. កាលិក ផង) ។

ដកស្រង់ពីវចនានុក្រមសម្ដេចព្រះសង្ឃរាជ ជួន ណាត