លោកមហាសេដ្ឋី Harry Triguboff ជានាយកគ្រប់គ្រង និងជាប្រធានក្រុមហ៊ុន Meriton Apartments Pty Ltd ដែលជាក្រុមហ៊ុនអចលនទ្រព្យ

លោក Harry Oscar Triguboff  កើតនៅថ្ងៃទី ០៣ ខែ មីនា ឆ្នាំ ១៩៣៣ ដែលអ្នកអភិវឌ្ឍន៍អចលនទ្រព្យ ។ មហាសេដ្ឋីអូស្ត្រាលីលោក Harry ជាមនុស្សម្នាក់ក្នុងចំណោមអ្នកមានបំផុតនៅប្រទេសអូស្ត្រាលី ។

គាត់គឺជាស្ថាបនិក និងជានាយកគ្រប់គ្រងនៃក្រុមហ៊ុន Meriton Apartments Pty Ltd ដែលជាក្រុមហ៊ុនអចលនទ្រព្យ ។ នៅខែ ឧសភា ឆ្នាំ ២០១៦ លោក Harry បានជាប់ចំណាត់ថ្នាក់នៅក្នុងបញ្ជីរបស់ទស្សនាវដ្តី BRW Rich 200 ប្រចាំឆ្នាំដែលជាអ្នកមានបំផុតនៅប្រទេសអូស្ត្រាលី ។

ជីវិតដំបូង និងការអប់រំ៖

លោក Harry បានចំណាយពេលនៅកុមារភាពរបស់គាត់នៅក្នុងសហគមន៍មួយនៅក្នុងទីក្រុង Tianjin ប្រទេសចិនហើយក្រោយមកក្នុងឆ្នាំ ១៩៤៧ គាត់បានផ្លាស់ទៅរស់នៅប្រទេសអូស្ត្រាលីដើម្បីទទួលការអប់រំនៅឯមហាវិទ្យាល័យ Scots នៅក្នុងទីក្រុងស៊ីដនី ។ ក្រោយមកគាត់បានបញ្ចប់សញ្ញាប័ត្រផ្នែកវាយនភ័ណ្ឌពីសាកលវិទ្យាល័យ Leeds នៅប្រទេសអង់គ្លេសមុនពេលធ្វើការនៅក្នុងក្រុមហ៊ុនអាជីវកម្មវាយនភណ្ឌនៅប្រទេសអ៊ីស្រាអែល និងអាហ្វ្រិកខាងត្បូង ។

លោក Harry បានត្រឡប់មកអូស្ត្រាលីវិញក្នុងឆ្នាំ ១៩៦០ និងបានក្លាយជាពលរដ្ឋអូស្រ្តាលីនៅឆ្នាំ ១៩៦១ ។ គាត់បានព្យាយាមលក់អចលនទ្រព្យ និងបានធ្វើការជាជំនួយការសាស្រ្តាចារ្យនៅសាកលវិទ្យាល័យប៉ុន្តែមិនទទួលបានជោគជ័យទេ​ ។ ហើយក្រោយមកគាត់បានទិញដីនៅតំបន់ Roseville ហើយជួលអ្នកសាងសង់ឱ្យចាប់ផ្តើមសាងសង់ផ្ទះ ។

ទ្រព្យសម្បត្តិ៖ Harry Triguboff

លោក Harry Triguboff គឺជាអ្នកអភិវឌ្ឍន៍អចលនទ្រព្យអូស្រ្តាលីដែលមានទ្រព្យសម្បត្តិសុទ្ធចំនួន ៦ ពាន់លានដុល្លារ ។ លោក Harry គឺជានាយកគ្រប់គ្រង និងជាប្រធានក្រុមហ៊ុន Meriton Apartments Pty Ltd ដែលជាក្រុមហ៊ុនអចលនទ្រព្យដោយបានសាងសង់ផ្ទះចំនួន ៨ យូនីតនៅតំបន់ Tempe នៅឯដងវិថី Smith ក្នុងឆ្នាំ ១៩៦៣ ។

ចាប់តាំងពីពេលនោះមកក្រុមហ៊ុនរបស់លោក Harry បានអភិវឌ្ឍទៅក្រុមហ៊ុនសាងសង់ផ្ទះដ៏ធំបំផុតនៅប្រទេសអូស្រ្តាលីដោយបានសាងសង់លំនៅដ្ឋានចំនួន ៦០,០០០ កន្លែងដែលភាគច្រើនបានអភិវឌ្ឍទៅជាទីក្រុង និងអាផាតមិន ។ ក្នុងចំណោមគម្រោងដែលគួរឱ្យកត់សំគាល់បំផុតរបស់ក្រុមហ៊ុន Meriton Apartments Pty Ltd គឺការសាងសង់អគារលំនៅដ្ឋានខ្ពស់បំផុតនៅក្នុងទីក្រុងស៊ីដនីដូចជាអគារ World Tower ក្នុង២០០១-២០០៤ ។

នៅខែ ឧសភា ឆ្នាំ ២០១១ យោងតាមរយះទស្សនាវដ្តី “ the Business Review Weekly ” បានឲ្យដឹងថាលោក Harry ប្រមាណថាទ្រព្យសម្បត្តិសុទ្ធមានចំនួន ៤,៣០ ពាន់លានដុល្លារអូស្រ្តាលីដែល ធ្វើឲ្យគាត់ក្លាយជាអ្នកមានបំផុតនៅលំដាប់ទី ៧ នៅប្រទេសអូស្ត្រាលី ។ ហើយគាត់ក៏ជាមនុស្សម្នាក់ដំបូងគេដែលបានឈ្នះពានរង្វាន់បុគ្គលឆ្នើមប្រចាំឆ្នាំនៅប្រទេសអូស្ត្រាលីចំនួន ២ ដង ម្តងក្នុងឆ្នាំ ២០០៣ និងម្តងទៀតក្នុងឆ្នាំ ២០០៩ ។

ប្រភព៖ Phnom Penh HR