Category: A Khmer Dictionary

ទ្វេព្យាង្គ

មានន័យថា (ម. ព. ព្យាង្គ) ។

ទ្វេប៉ូលមហាសមុទ្រឥណ្ឌា

?ថ្នាក់ពាក្យជា បច្ចេកសព្ទបរិស្ថាន
មានន័យថា វិសមរូបសីតុណ្ហភាពនៃផ្ទៃទឹកសមុទរដែលមានទ្រង់ទ្រាយធំនៅមហាឥណ្ឌារវាងឆ្នាំនានា ហើយទម្រង់បែបនេះស្តែងឡើងតាមរយៈសីតុណ្ហភាពខុសគ្នានៃផ្ទៃទឹកសមុទ្រនៅតំបន់ត្រូពិចអាកាសធាតុត្រជាក់ភាគខាងជើង ដោយបង្ហាញពីការចុះត្រជាក់នៅស៊ូម៉ាត្រា និងឡើងកម្តៅនៅសូម៉ាលីភាគខាងលិច រួមផ្សំជាមួយចរន្តខ្យល់មិនប្រក្រតីបក់ទៅទិសខាងកើតស្របជាមួយខ្សែអេក្វាទ័រ។

ទ្វេបាទ

មានន័យថា (ម. ព. ទ្វិបាទ ) ។

ទ្វេបថ

?ថ្នាក់ពាក្យជា នាមសព្ទ
មានន័យថា ការឆ្លាស់គ្នា ដូចយ៉ាងពីរក្តៅទៅត្រជាក់ជាដើម ការមិនដាច់ស្រេច រារែកក្នុងចិត្ត ដូចជាចង់ទៅបន្តិច មិនចង់ទៅបន្តិច ។

ទ្វេធ្វេស

?ថ្នាក់ពាក្យជា កិរិយាសព្ទ
មានន័យថា ( ម. ព. ធ្វេសទ្វេ ) ។

ទ្វេចាលភាព

?ថ្នាក់ពាក្យជា នាមសព្ទ
មានន័យថា ការវង់វាស​ បញ្ចិតបញ្ឆៀង មិនព្រមនិយាយឱ្យចំតាម​កម្មវត្ថុនៃការចរចា ។

ទ្វេគ្រាះ

?ថ្នាក់ពាក្យជា នាមសព្ទ
មានន័យថា (សំ. ) ការប្រកាន់យកចំណែកពីរផ្ទុយពីគ្នា តែមានដំណើរឬគោលបំណងទៅកាន់ទីដៅតែមួយ ។
ឧទាហរណ៍៖ ក្នុងសន្និបាតនីមួយៗ សមាជិកច្រើនតែចួបប្រទះនូវទ្វេគ្រាះ ។

                  សំអាងដែលមានដំណើរផ្ទុយគ្នា តែគង់នឹងឆ្ពោះទៅកាន់ទីដៅតែមួយ។

ទ្វេគុណ

?ថ្នាក់ពាក្យជា គុណនាម
មានន័យថា (សំ. បា. ទ្វិគុណ; បា. ជា ទ្វេគុណ ក៏មាន ) ដូចគ្នានឹង ទ្វីគុណ ដែរ ។

ទ្វេ

?ថ្នាក់ពាក្យជា កិរិយាសព្ទ
មានន័យថា (បា. ទ្វិ> ទ្វេ ) ពីរ ។
ឧទាហរណ៍៖ កាន់តែទ្វេឡើង គឺកាន់តែថែមឡើង ឬចម្រើនឡើងមួយជាពីរ ។

ទ្វីបូដ

?ថ្នាក់ពាក្យជា នាមសព្ទ
មានន័យថា បានដល់សត្វដែលមានសំបកពីរផ្អោបគ្នា ដូចយ៉ាងគ្រំ លៀស ចំពុះទា​ជាដើម។
?ថ្នាក់ពាក្យជា គុណនាម
មានន័យថា បានដល់សត្វដែលមានសំបកពីរផ្អោបគ្នា ដូចយ៉ាងគ្រំ លៀស ចំពុះទា​ជាដើម។

ទ្វីប

?ថ្នាក់ពាក្យជា នាមសព្ទ
មានន័យថា (សំ.; បា. ទីប ) ប្រទេសដែលឋិតជាក់ស្ដែងក្នុងកណ្ដាលទឹក (កោះ ) ។

ទ្វីគុណ

?ថ្នាក់ពាក្យជា គុណនាម
មានន័យថា (សំ. បា. ទ្វិគុណ ) ដែលគុណដោយចំណែកពីរ, ដែលចម្រើនមួយជាពីរ ( ម. ព. គុណ ផង ) ។

ទ្វី

?ថ្នាក់ពាក្យជា បកតិសំខ្យា
មានន័យថា (សំ. បា. ទ្វិ ) ពីរ​ ។

ទ្វិសប្តាហៈ

?ថ្នាក់ពាក្យជា នាមសព្ទ
មានន័យថា (សំ.),(បា.) (ទ្វិ + សប្តាហ; ទ្វិ + សត្តាហ) ពីរ​សប្តាហៈ, ពីរ​អាទិត្យ ។
?ថ្នាក់ពាក្យជា គុណនាម
មានន័យថា ដែល​ផ្សាយ​ចេញ​ពីរ​ដង​ក្នុង​មួយ​អាទិត្យ ។
ឧទាហរណ៍៖ ទស្សនាវដ្តី ទ្វិ​សប្តាហ៍ ។ ទ្វិសប្ដាហ៍ (–ស័ប-ប្តា)

ទ្វិសប្ដាហ៍

?ថ្នាក់ពាក្យជា នាមសព្ទ
មានន័យថា ( ម. ព. ទ្វិសប្ដាហៈ ន. ) ។
?ថ្នាក់ពាក្យជា គុណនាម
មានន័យថា ( ម. ព. ទ្វិសប្ដាហៈ គុ. ) ។

ទ្វិសប្ដាហៈ

?ថ្នាក់ពាក្យជា នាមសព្ទ
មានន័យថា (សំ. ទ្វិ + សប្ដាហ; បា. ទ្វិ + សត្តាហ ) ពីរសប្ដាហៈ, ពីរអាទិត្យ។

ទ្វិរាប

?ថ្នាក់ពាក្យជា នាមសព្ទ
មានន័យថា (សំ.) សត្វ​ដែល​ផឹក​ទឹក​ពីរ​លើក គឺ​ផឹក​ដោយ​ប្រមោយ​មួយ​លើក ដោយ​មាត់​មួយ​លើក (ដំរី) ។

ទ្វិពីជបត្តជាតិ

?ថ្នាក់ពាក្យជា នាមសព្ទ
មានន័យថា រុក្ខជាតិដែលមានបណ្តូលពីរក្នុងគ្រាប់ ដូចយ៉ាងគ្រាប់ស្វាយជាដើម ។

ទ្វិពីជបត្តជា

?ថ្នាក់ពាក្យជា នាមសព្ទ
មានន័យថា រុក្ខជាតិដែលមានបណ្តូលពីរក្នុងគ្រាប់ ដូចយ៉ាងគ្រាប់ស្វាយជាដើម ។

ទ្វិបាទ

?ថ្នាក់ពាក្យជា នាមសព្ទ
មានន័យថា (សំ.),(បា.) សត្វ​ជើង​ពីរ; ដែល​មាន​ជើង​ពីរ។
ឧទាហរណ៍៖ សត្វ​ទ្វេ​បាទ ។ ទ្វេបាទ ។

?ថ្នាក់ពាក្យជា គុណនាម
មានន័យថា (សំ.),(បា.) សត្វ​ជើង​ពីរ; ដែល​មាន​ជើង​ពីរ
ឧទាហរណ៍៖ សត្វ​ទ្វេ​បាទ ។ ទ្វេបាទ ។

ទ្វិបទ

?ថ្នាក់ពាក្យជា នាមសព្ទ
មានន័យថា (សំ. បា. ) សត្វមានជើងពីរ (សត្វជើងពីរ), ដែលមានជើងពីរ ។
ឧទាហរណ៍៖ សត្វទិ្វបទ ។

?ថ្នាក់ពាក្យជា គុណនាម
មានន័យថា (សំ. បា. ) សត្វមានជើងពីរ (សត្វជើងពីរ), ដែលមានជើងពីរ ។
ឧទាហរណ៍៖ សត្វ​ទ្វិបទ ។

ទ្វិធា

?ថ្នាក់ពាក្យជា នាមសព្ទ
មានន័យថា បទសមោធានពិជគណិត ដែលមានសញ្ញា – នឹង + ភ្ជាប់ជាមួយដូចជា a+b= b2-4ac ជាដើម ។

ទ្វិទន្ត

?ថ្នាក់ពាក្យជា នាមសព្ទ
មានន័យថា (សំ. បា. ) សត្វមានភ្លុកពីរ (ដំរី ) ។

ទ្វិជក

?ថ្នាក់ពាក្យជា នាមសព្ទ
មានន័យថា ( សំ. បា. ទ្វិជ “បក្សី” + ករ “ពួក, ហ្វូង”) បក្សី ឬ ហ្វូងបក្សី ។

ទ្វិកភាព

?ថ្នាក់ពាក្យជា នាមសព្ទ
មានន័យថា លក្ខណៈដែលគូស្រាប់ ដូចជារូបធាតុ និងទឹក ។

ទ្វិកនិយម

?ថ្នាក់ពាក្យជា នាមសព្ទ
មានន័យថា ប្រព័ន្ធខាងលទ្ធិសាសនា ឬទស្សនវិជ្ជាដែលមានគោលការណ៍ពីរប្រការ ដូចជារូបធាតុ និងចិត្ត ។

ទ្វារបាល

?ថ្នាក់ពាក្យជា នាមសព្ទ
មានន័យថា ឆ្មាំទ្វារ អ្នកទទួលភារៈខាងការបើកបិទទ្វារនៃគ្រឹះស្ថាន ។

ទ្វារបតី

?ថ្នាក់ពាក្យជា នាមសព្ទ
មានន័យថា (សំ. បា. ទ្វារបតិ) ម្ចាស់ទ្វារ, អ្នកដែលជាធំក្នុងការរក្សាទ្វារ (នាយទ្វារ ) ។

ទ្វារនោម

?ថ្នាក់ពាក្យជា រាជសព្ទ
មានន័យថា ព្រះបស្សាវមគ្គ ។

ទ្វារនាយក

?ថ្នាក់ពាក្យជា នាមសព្ទ
មានន័យថា (សំ. បា.) អ្នកត្រួតត្រាទ្វារ ( នាយទ្វារ ) ។

ទ្វារជុះ

?ថ្នាក់ពាក្យជា រាជសព្ទ
មានន័យថា ព្រះវច្ចមគ្គ ។

ទ្វារ

?ថ្នាក់ពាក្យជា នាមសព្ទ
មានន័យថា (សំ. បា.) ច្រកមានសន្ទះឬរនាំងសម្រាប់បើកបិទចេញចូល ។
ឧទាហរណ៍៖ ទ្វារផ្ទះ, ទ្វាររបង ។

​​​                 ច្រកឬប្រហប់ដែលមានភ្នំអមទាំងពីរខាង ឬឈូងសមុទ្ទជាដើម ទោះមានកោះឬភ្នំអមទាំងពីរខាងក្ដី មានតែដីគោកអមក្ដី ក៏ហៅ ទ្វារ ដែរ ។
ឧទាហរណ៍៖ ទ្វារកំពត, ទ្វារសមុទ្ទ ។

ទ្វាទសវត្សរ៍

?ថ្នាក់ពាក្យជា នាមសព្ទ
មានន័យថា (សំ. ទ្វាទស “ដប់ពីរ” + វត្ស ឬ វត្សរ “ឆ្នាំ”) ឆ្នាំទាំងដប់ពីរ; មួយខួបឆ្នាំ; មួយទ្វាទសវត្សរ៍ គឺមួយខួបឆ្នាំ ។

ទ្វាទសមាស

?ថ្នាក់ពាក្យជា នាមសព្ទ
មានន័យថា (បា.) ខែ​ទាំង​ដប់​ពីរ; មួយ​ខួប​ខែ គឺ​មួយ​ឆ្នាំ ។ ក្នុង​កម្ពុជ​ប្រទេស​យើង, ប្រើ​ជា​ឈ្មោះ​បុណ្យ​ ឬ​ព្រះ​រាជ​ពិធី​មួយ ដែល​ធ្វើ​ក្នុង​មួយ​ខែ​ម្ដង ជា​ទំនៀម​តាម​រាជ​ប្រពៃណី។
ឧទាហរណ៍៖ បុណ្យ​ទ្វាទសមាស, ពិធី​ទ្វាទសមាស ។

ទ្វាទសកៈ

?ថ្នាក់ពាក្យជា នាមសព្ទ
មានន័យថា វត្ថុដូចគ្នាមួយឡូ គឺចំនួន១២ ។

ទ្វាទស

?ថ្នាក់ពាក្យជា បកតិសំខ្យា
មានន័យថា (បា.) ដប់ពីរ (១២ ) ។

ទ្វយវាទ

?ថ្នាក់ពាក្យជា នាមសព្ទ
មានន័យថា (សំ.),(បា.)សម្ដី​ពីរ​ពាក្យ; សម្ដី​ដែល​មាន​ន័យ​ជា​ពីរ​ប្រភេទ ។

ទ្វន្ទយុធ

?ថ្នាក់ពាក្យជា នាមសព្ទ
មានន័យថា (សំ. បា. ) ការតយុធគ្នា, ប្រឡូកគ្នាតតួ ។

ទ្វន្ទ

?ថ្នាក់ពាក្យជា នាមសព្ទ
មានន័យថា (សំ. បា. ) គូ ។
?ថ្នាក់ពាក្យជា គុណនាម
មានន័យថា (សំ. បា.) ទាំងគូ (ប្រើតែខាងកាព្យ )។
?ថ្នាក់ពាក្យជា កិរិយាវិសេសន៍
មានន័យថា (សំ. បា.) ទាំងគូ (ប្រើតែខាងកាព្យ )។

ទ្រះនលាត

?ថ្នាក់ពាក្យជា រាជសព្ទ
មានន័យថា ថ្ងាស ។

ទ្រោល

?ថ្នាក់ពាក្យជា កិរិយាសព្ទ
មានន័យថា បំភ្លឺ, ជ្រោងបំភ្លឺដោយពន្លឺភ្លើងចន្លុះ, ភ្លើងគប់ឬចង្កៀង ។
ឧទាហរណ៍៖ ទ្រោលចង្កៀងឲ្យជិតបន្តិចមក! ;

                  បោល​ពេញ​ទំហឹង ។
ឧទាហរណ៍៖​ គោ​ទ្រោល, ក្របី​ទ្រោល ។

ទ្រោម !

?ថ្នាក់ពាក្យជា ឧទានសព្ទ
មានន័យថា សូរ​សម្ដី​បង្គាប់​ដំរី​ឲ្យ​ក្រាប គឺ​ឲ្យ​លុត​ជើង​មុខ​ទាំង​២​ចុះ ឲ្យ​បន្ទាប​ជើង​ក្រោយ​ទាំង​២ ដើម្បី​លាង​ទឹក​វា​ជាដើម ។

ទ្រោប

?ថ្នាក់ពាក្យជា កិរិយាសព្ទ
មានន័យថា ពោប, ក្រុង​ពី​លើ។
ឧទាហរណ៍៖  ឆ្មា​ទ្រោប​ចាប់​កណ្ដុរ ។

ទ្រែលទ្រល

?ថ្នាក់ពាក្យជា គុណនាម
មានន័យថា ដែល​ត្រេះត្រុះ, ដែល​គ្រលែះគ្រលស ទៅ​ត្រង់​នេះ​ខ្លះ ត្រង់​នោះ​ខ្លះ ដូច​ជា​ឥត​មាន​ការ​អ្វី​នឹង​ធ្វើ។
ឧទាហរណ៍៖ រាង​ទ្រែលទ្រល, ដើរ​ទ្រែលទ្រល ។

?ថ្នាក់ពាក្យជា កិរិយាវិសេសន៍
មានន័យថា ដែល​ត្រេះត្រុះ, ដែល​គ្រលែះគ្រលស ទៅ​ត្រង់​នេះ​ខ្លះ ត្រង់​នោះ​ខ្លះ ដូច​ជា​ឥត​មាន​ការ​អ្វី​នឹង​ធ្វើ ។
ឧទាហរណ៍៖  រាង​ទ្រែលទ្រល, ដើរ​ទ្រែលទ្រល ។

ទ្រែម

?ថ្នាក់ពាក្យជា បរិវារសព្ទ
មានន័យថា ពាក្យ​សម្រាប់​និយាយ​ផ្សំ​នឹង​ពាក្យ ទ្រម ។
ឧទាហរណ៍៖ ទ្រែមទ្រម គឺ​ទ្រម​ខ្លាំង, រដេមរដម ។

ទ្រេល

?ថ្នាក់ពាក្យជា កិរិយាសព្ទ
មានន័យថា ធ្លាយ​ជ្រាល​ចេញ​មក។
ឧទាហរណ៍៖ គំនរ​ស្រូវ​ទ្រេល; ធ្លាយ​ទ្រេល ។

?ថ្នាក់ពាក្យជា នាមសព្ទ
មានន័យថា គំនរអ្វីៗដែលកើតដោយធ្លាយឬដោយស្រាវដាក់ ។
ឧទាហរណ៍៖ ពោះវៀនមួយទ្រេល, ស្រូវមួយទ្រេល ជាដើម ។

?ថ្នាក់ពាក្យជា កិរិយាវិសេសន៍
មានន័យថា ធ្លាយ​ជ្រាល​ចេញ​មក ។
ឧទាហរណ៍៖ គំនរ​ស្រូវ​ទ្រេល; ធ្លាយ​ទ្រេល ។

ទ្រេតទ្រោត

?ថ្នាក់ពាក្យជា គុណនាម
មានន័យថា ងេកងោក, ដែល​ទេរ​ងាក​ទៅ​ខាង​នេះ​ម្ដង​ទៅ​ខាង​នោះ​ម្ដង ។
ឧទាហរណ៍៖ ដើរ​ទ្រេតទ្រោត; ដំណើរ​ទ្រេតទ្រោត ។

?ថ្នាក់ពាក្យជា កិរិយាវិសេសន៍
មានន័យថា ងេកងោក, ដែល​ទេរ​ងាក​ទៅ​ខាង​នេះ​ម្ដង​ទៅ​ខាង​នោះ​ម្ដង ។
ឧទាហរណ៍៖ ដើរ​ទ្រេតទ្រោត; ដំណើរ​ទ្រេតទ្រោត ។

ទ្រេត

?ថ្នាក់ពាក្យជា គុណនាម
មានន័យថា ដែល​ទេរ, ជ្រេ ។
ឧទាហរណ៍៖ ផ្ទះ​ទ្រេត ។

ទ្រៀស

?ថ្នាក់ពាក្យជា នាមសព្ទ
មានន័យថា បន្ទោះ​លប
ឧទាហរណ៍៖ បិទ​ទ្រៀស​លប ។

                 មើលក្នុងពាក្យ គ្រៀស ។

ទ្រៀលស្វា (វល្លិ)

?ថ្នាក់ពាក្យជា នាមសព្ទ
មានន័យថា វល្លិធំមានប្រវែងរហូតដល់ ២0ម វាឡើងឈើធំៗកនុងព្រៃក្រាស់ នឹងព្រៃល្បោះនៃឧបទ្វីបឥណ្ឌូនេស៊ី និងហ្វីលីពីន។ ផ្កាក្លិនក្រអូប ផ្លែទុំសម្បុរក្រហម រសជូរបន្តិចៗ ឬផ្អែមអាចបរិភោគបាន។ គ្រូបុរាណស្ងោរឫសជាថ្នាំលើកកម្លាំងសម្រាប់ឱ្យនារីទើបសម្រាលកូនហើយផឹក។

ទ្រៀលដោះក្របី

?ថ្នាក់ពាក្យជា នាមសព្ទ
មានន័យថា ដើមជាវល្លិ សាច់រឹង ឡើងតោងដើមឈើខ្ពស់ ដុះក្នុងព្រៃជ្រៅ ឬព្រៃស្រោងនៃឥណ្ឌូចិន និងប្រទេសជ្វា (Java)។ ផ្កាក្រអូបល្អ។ ផ្លែថ្លោសៗ ប៉ុនៗដោះក្របី ផ្លែទុំមានសម្បុរក្រហម មានរសជូរអែម។ គេចូលចិត្តបរិភោគណាស់ គេអាចឃើញផ្លែលក់តាមផ្សារ នៅខែមីនា- មេសា។

ទ្រៀល

?ថ្នាក់ពាក្យជា នាមសព្ទ
មានន័យថា ឈ្មោះ​ឈើ​តូច ​និង​វល្លិ​ដើម​រឹង មាន ២ ប្រភេទ​គឺ ទ្រៀល​ស្វា មាន​ដើម​តូច​ៗ​ដុះ​បែក​ជា​គុម្ព​ធំ​ៗ មាន​ផ្លែ​តូច​ៗ​ជា​ចង្កោម​ៗ ស្រដៀង​នឹង​ផ្លែ​ជើង​ចាប​តូច ផ្លែ​ទុំ​មាន​សម្បុរ​ក្រហម​បរិភោគ​បាន មាន​រស​ផ្អែម​ស្រទន់​បន្តិច; ទ្រៀល​ដោះ​ក្របី មាន​ដើម​ជា​វល្លិ​ថ្លោស​ៗ​សាច់​រឹង ឡើង​តោង​ដើម​ឈើ​ខ្ពស់​មាន​ផ្លែ​ថ្លោស​ៗ ប៉ុន​ៗ​ដោះ​ក្របី​ញី ផ្លែ​ជា​ចង្កោម​ៗ ផ្លែ​ទុំ​មាន​សម្បុរ​ក្រហម បរិភោគ​បាន មាន​រស​ជូរ​អែម; ទ្រៀល​ទាំង ២​ប្រភេទ​នេះ ដុះ​ឯង​ពុំ​ដែល​ឃើញ​មាន​អ្នក​ណា​មួយ​ដាំ​ទេ ជា​ផល​ព្រឹក្ស​មាន​ប្រយោជន៍​គួរ​រក្សា​ទុក​ឲ្យ​មាន​ជិត​ភូមិ ដែល​វា​ដុះ​ឯង ។ សរសេរ​ជា ត្រៀល ក៏​បាន ។

ទ្រៀក

?ថ្នាក់ពាក្យជា នាមសព្ទ
មានន័យថា ឈ្មោះ​ឈើ​មួយ​ប្រភេទ ។
កាលព្រឹក្សម្យ៉ាងកម្ពស់ ២០-២៥ម ដុះក្នុងព្រៃធំនឹងព្រៃល្បោះ នៃទ្វីបអាស៊ីផ្នែកក្តៅ។ គេច្រើនប្រើស្លឹកវាសម្រាប់ប្រក់ផ្ទះ ឬធ្វើមួក។

កក

?ថ្នាក់ពាក្យជា គុណនាម
មានន័យថា ដែល​មាន​មាត្រ​ទ្រង់ទ្រើស​ជាង (ច្រើន​ប្រើ​តែ​ក្នុង​កាព្យ) ។

ទ្រើសឃ្នង

?ថ្នាក់ពាក្យជា គុណនាម
មានន័យថា ដែល​ឃ្នើសឃ្នង ។
ឧទាហរណ៍៖ មនុស្ស​ទ្រើស​ឃ្នង, សម្ដី​ទ្រើស​ឃ្នង (ម. ព. ឃ្នើសឃ្នង ផង) ។

ទ្រើស

?ថ្នាក់ពាក្យជា គុណនាម
មានន័យថា ដែល​ធំ​ជាង​គ្នា​តែ​បន្តិច​បន្តួច ។
ឧទាហរណ៍៖ ផ្តិល​អ្នក​ទ្រើស​ជាង​ខ្ញុំ ។

                 ទ្រើស​កម្លាំង, ទ្រើស​ចិត្ត ដែល​ឡើង​កម្លាំង, ឡើង​ចិត្ត​ព្រោះ​ទម្រើស​ ឬ​ព្រោះ​នៅ​ស្រណុក ។

ទ្រើតៗ

?ថ្នាក់ពាក្យជា កិរិយាវិសេសន៍
មានន័យថា ដែលមានលំនាំញាក់ទទាក់លោតៗ អើតៗ ។
ឧទាហរណ៍៖ ញ័រទ្រើតៗ ។

ទ្រើង

?ថ្នាក់ពាក្យជា នាមសព្ទ
មានន័យថា រាន, សម្រាស់, ជន្លង់​តូច សម្រាប់​ឲ្យ​ដំណាំ​វល្លិ​វារ, ព័ទ្ធ​ឡើង។
ឧទាហរណ៍៖ ទ្រើង​ត្រឡាច, ទ្រើង​ឃ្លោក, ទ្រើង​សណ្ដែក ។

                  ឈ្មោះ​ត្រសក់ ឬ​សណ្ដែក​ដែល​ឡើង​ទ្រើង ។
ឧទាហរណ៍៖ ត្រសក់​ទ្រើង, សណ្ដែក​ទ្រើង ។

ទ្រួសៗ

មានន័យថា (ម. ព. ត្រួស​ៗ ឬ ទ្រួស​ៗ) ។

ទ្រួស

(ម. ព. ត្រួស ឬ ទ្រួស កិ.) ។ (ម. ព. ត្រួស ឬ ទ្រួស ន.) ។

ទ្រួក

?ថ្នាក់ពាក្យជា កិរិយាសព្ទ
មានន័យថា សឹក​រិច​រឹល, រង្គោះរង្គើ ។
ឧទាហរណ៍៖  ខ្ចៅ​ម៉ាស៊ីន​នេះ ទ្រួក​ខូច​អស់​ហើយ ប្រើ​ការ​មិន​កើត​ទេ ។

?ថ្នាក់ពាក្យជា គុណនាម
មានន័យថា សឹក​រិច​រឹល, រង្គោះរង្គើ ។
ឧទាហរណ៍៖ ខ្ចៅ​ម៉ាស៊ីន​នេះ ទ្រួក​ខូច​អស់​ហើយ ប្រើ​ការ​មិន​កើត​ទេ ។

ទ្រូលាវ

?ថ្នាក់ពាក្យជា នាមសព្ទ
មានន័យថា ទ្រូមានប្រឹស ២ គឺលើ ១ ក្រោម ១, ប្រឹសលើមានមុខទៅខាងលើ, ប្រឹសក្រោមមុខមកខាងក្រោម ( ធ្វើតាមបែបទ្រូរបស់លាវ )។ ព. ទ. បុ. ដូចទ្រូលាវ ជាពាក្យនិយាយសំដៅមនុស្សដែលមានលាភចូលមកពីទីផ្សេងៗឥតអាក់ ប្រៀបដូចទ្រូលាវដែលត្រូវត្រីតាមប្រឹសទាំងពីរ ។

ទ្រូងផ្លូវ

?ថ្នាក់ពាក្យជា ទ្រព្យសម្បត្តិរដ្ឋ
មានន័យថា ចំណែកនៃផ្លូវ ទុកសម្រាប់ឱ្យយានជំនិះគ្រប់ប្រភេទធ្វើចរាចរណ៍។

ទ្រូង

?ថ្នាក់ពាក្យជា នាមសព្ទ
មានន័យថា អវយវៈ​មនុស្ស​ត្រង់​ប៉ែក​ខាង​មុខ ពី​ក្រោម​ដង​កាំបិត​ចុះ​មក​ចុង​ដង្ហើម; អវយវៈ​របស់​សត្វ​តិរច្ឆាន​ទ្វេ​បាទ ឬ​ចតុប្បាទ​ត្រង់​ប៉ែក​ខាង​លើ​ពោះ ។ ទ្រូង​ផ្លូវ ទី​ចំ​កណ្ដាល​ដង​ផ្លូវ ។ ទ្រូង​ព្រៃ ទី​កណ្ដាល​ដង​ព្រៃ ។ សសរ​ទ្រូង សសរ​កណ្ដាល​ដែល​ទ្រ​មេ​ដំបូល ឬ​ដែល​ទ្រ​ធ្នឹម​ល្វែង​កណ្ដាល (សសរ​គ្រឹះ) ។

ទ្រូ

?ថ្នាក់ពាក្យជា នាមសព្ទ
មានន័យថា ប្រដាប់​នេសាទ​ធ្វើ​ដោយ​បន្ទោះ​ឫស្សី​ក្រង​រាង​ប៉ោង​កណ្ដាល​មាន​ប្រឹស​នៅ​ខាង​ចំហៀង។
ឧទាហរណ៍៖ ដាក់​ទ្រូ, លើក​ទ្រូ, ត្រី​ទ្រូ ។

ទ្រុះ

?ថ្នាក់ពាក្យជា កិរិយាសព្ទ
មានន័យថា (សំ. ទ្រុហ, ហ> ះ = ទ្រុះ ) បៀតបៀន, ព្យាយាមរករឿងបៀតបៀន, ស្អប់, ចងគំនុំ ។
?ថ្នាក់ពាក្យជា នាមសព្ទ
មានន័យថា (សំ. ទ្រុហ, ហ> ះ = ទ្រុះ ) អ្នកបៀតបៀន; ដែលរករឿងបៀតបៀន ។
ឧទាហរណ៍៖​ ​មនុស្សទ្រុះមិត្រ (ម. ព. ទ្រុស្ដ ផង ) ។

?ថ្នាក់ពាក្យជា គុណនាម
មានន័យថា (សំ. ទ្រុហ, ហ> ះ = ទ្រុះ ) អ្នកបៀតបៀន; ដែលរករឿងបៀតបៀន ។
ឧទាហរណ៍៖ មនុស្សទ្រុះមិត្រ (ម. ព. ទ្រុស្ដ ផង ) ។

ទ្រុស្ដសីល

?ថ្នាក់ពាក្យជា គុណនាម
មានន័យថា (សំ. ទុស្ដ+សីល; បា. ទុស្សីល ) ដែលមានសីលមិនបរិសុទ្ធ ។
ឧទាហរណ៍៖ មនុស្សទ្រុស្ដសីល ។

ទ្រុស្ដ

?ថ្នាក់ពាក្យជា កិរិយាសព្ទ
មានន័យថា (សំ.) (ទុស្ដ) ប្រទូស្ដ, ធ្វើ​អាក្រក់ ។
ឧទាហរណ៍៖ មនុស្ស​ទ្រុស្ដ​មិត្រ ។

ទ្រុល

?ថ្នាក់ពាក្យជា កិរិយាវិសេសន៍
មានន័យថា ដែល​ច្រើន, ក្រាស់, ញឹក ។
ឧទាហរណ៍៖ ដុះ​ទ្រុល, ហុយ​ទ្រុល, ជេរ​បញ្ចោរ​ទ្រុល ។

                 ទ្រុលទ្រុប ឬ ទ្រុបទ្រុល ដែលដុះស្ដុកជិតណាស់ ។
ឧទាហរណ៍៖ ព្រៃទ្រុបទ្រុល ។

ទ្រុយ

?ថ្នាក់ពាក្យជា កិរិយាសព្ទ
មានន័យថា ពាយ​ដោយ​មាន​តែ​ស្លឹក​ស្រោប​គុម្ព​មាន​ផ្លែ​បន្ដិច​បន្ដួច (ប្រើ​តាម​ទម្លាប់​ដោយ​ស្រុក) ។
ឧទាហរណ៍៖ ស្រុក​ខ្ញុំ​ឆ្នាំ​នេះ ស្រូវ​មាន​ដើម​ដង​គ្រាន់​បើ ប៉ុន្តែ​ច្រើន​ទ្រុយ ។

?ថ្នាក់ពាក្យជា គុណនាម
មានន័យថា ពាយ​ដោយ​មាន​តែ​ស្លឹក​ស្រោប​គុម្ព​មាន​ផ្លែ​បន្ដិច​បន្ដួច (ប្រើ​តាម​ទម្លាប់​ដោយ​ស្រុក) ។
ឧទាហរណ៍៖ ស្រុក​ខ្ញុំ​ឆ្នាំ​នេះ ស្រូវ​មាន​ដើម​ដង​គ្រាន់​បើ ប៉ុន្តែ​ច្រើន​ទ្រុយ ។

ទ្រុម

?ថ្នាក់ពាក្យជា នាមសព្ទ
មានន័យថា (សំ.; បា. ទុម ) ឈើ, ដើមឈើ ។ ខ្មែរយើងច្រើននិយាយថា ស៊ុមទ្រុម ។
?ថ្នាក់ពាក្យជា គុណនាម
មានន័យថា ដែល​មាន​ឈើ​ដុះ​ទ្រុបទ្រុល, សុប​ប្រឡុប ។
ឧទាហរណ៍៖ ព្រៃ​ស៊ុម​ទ្រុម ។

ទ្រុបទ្រុប

?ថ្នាក់ពាក្យជា គុណនាម
មានន័យថា ដែល​ដុះ​ស្ដុក, ក្រាស់, ជិត ។
ឧទាហរណ៍៖ ព្រៃ​ទ្រុប, ដុះ​ទ្រុប ។

?ថ្នាក់ពាក្យជា កិរិយាវិសេសន៍
មានន័យថា ដែល​ដុះ​ស្ដុក, ក្រាស់, ជិត ។
ឧទាហរណ៍៖ ព្រៃ​ទ្រុប, ដុះ​ទ្រុប ។

ទ្រុឌ

?ថ្នាក់ពាក្យជា កិរិយាសព្ទ
មានន័យថា (សំ.) ស្រុត, ស្រុត​ចុះ, លិច​ចុះ; ផត​ខូង​ចុះ ។
ឧទាហរណ៍៖ ស្ពាន​បេតុង​ចាស់​ទ្រុឌ​មួយ​កន្លែង​ត្រង់​ផ្ទៃ​កណ្ដាល ។

                   ទ្រុឌទ្រោម ទ្រុឌ​ផង​ទ្រោម​ផង ។ ព. ប្រ. រាង​កាយ​ទ្រុឌទ្រោម រាង​កាយ​ដែល​ចាស់​គ្រាំគ្រា​ណាស់ ។

ទ្រុង

?ថ្នាក់ពាក្យជា នាមសព្ទ
មានន័យថា ប្រដាប់​សម្រាប់​ដាក់, សម្រាប់​ប្រស់, សម្រាប់​ខាំង​សត្វ​ទាំងឡាយ ។
ឧទាហរណ៍៖ ទ្រុង​លលក, ទ្រុង​មាន់, ទ្រុង​ត្រី, ទ្រុង​ខ្លា ជាដើម ។

ទ្រឹស្តីបទ

?ថ្នាក់ពាក្យជា នាមសព្ទ
មានន័យថា សេចក្តីសន្និដ្ឋានក្នុងផ្លូវគណិតសាស្រ្ត ។

ទ្រឹស្ដី

មានន័យថា ម. ព. ទ្រឹស្ដិ ។

ទ្រឹស្ដិស្មូរ

?ថ្នាក់ពាក្យជា នាមសព្ទ
មានន័យថា ដែលប្រកាន់ទិដ្ឋិព្រមទាំងមានចិត្តស្មូរផង ។
ឧទាហរណ៍៖ មនុស្សទ្រឹស្ដិស្មូរ ។ ច្រើនយកសេចក្ដីថា កំណាញ់ស្វិត គឺកំណាញ់ក្រៅតម្រា ។

?ថ្នាក់ពាក្យជា គុណនាម
មានន័យថា ដែលប្រកាន់ទិដ្ឋិព្រមទាំងមានចិត្តស្មូរផង ។
ឧទាហរណ៍៖ មនុស្សទ្រឹស្ដិស្មូរ ។ ច្រើនយកសេចក្ដីថា កំណាញ់ស្វិត គឺកំណាញ់ក្រៅតម្រា ។

ទ្រឹស្តិ

?ថ្នាក់ពាក្យជា នាមសព្ទ
មានន័យថា (សំ. ទ្ឫស្ដិ; បា. ទិដិ្ឋ) មើល​ពាក្យ ទិដ្ឋិ ។ ពាក្យ​នេះ សព្វ​ថ្ងៃ​ប្រើ​ជា ទ្រឹស្ដី (ជើង ដ) គឺ​ការ​ឃើញ​ដោយ​ភ្នែក ឬ​ការ​យល់​ឃើញ​ដោយ​គំនិត​ប្រាជ្ញា​យោបល់, គោល​ការណ៍​ដែល​ពន្យល់​ចង្អុល​ប្រាប់​នូវ​ដំណើរ​ទំនង​នៃ​កិច្ច​ការ​ទាំងពួង​ដែល​ត្រូវ​ធ្វើ​យ៉ាង​ណា​ៗ។
ឧទាហរណ៍៖ រឿង​នេះ​គ្រាន់​តែ​ជា​ទ្រឹស្ដី​ទេ, បុគ្គល​នេះ​មាន​តែ​ទ្រឹស្ដី តែ​មិន​ទាន់​មាន​ការ​ប្រតិបត្តិ ឬ​ការ​ពិសោធ​នៅ​ឡើយ​ទេ; ទ្រឹស្ដី​ទុក​ជា​មូលដ្ឋាន​នៃ​កិច្ច​ប្រតិបត្តិ ។ ទ្ឫស្ដិ

ទ្រឹង

?ថ្នាក់ពាក្យជា កិរិយាសព្ទ
មានន័យថា ឈប់​ស្ងៀម, ដំអក់, ក្រាញ​ដោយ​រឹង​ត្អឹង
ឧទាហរណ៍៖ ទ្រឹង​មួយ​ស្របក់; ឈរ​ទ្រឹង​ដល់​ណា​ទៀត​ម្ដេច​ក៏​មិន​ទៅ ?

?ថ្នាក់ពាក្យជា កិរិយាវិសេសន៍
មានន័យថា ឈប់ស្ងៀម, ដំអក់, ក្រាញដោយរឹងត្អឹង
ឧទាហរណ៍៖ ទ្រឹងមួយស្របក់; ឈរទ្រឹងដល់ណាទៀតម្ដេចក៏មិនទៅ ?

ទ្រីប៉ូលី

?ថ្នាក់ពាក្យជា នាមសព្ទ
មានន័យថា រាជធានី/​រដ្ឋធានី នៃប្រទេស លីប៊ី។

ទ្រីនីដាដ និងតូបាហ្គោ

?ថ្នាក់ពាក្យជា នាមសព្ទ
មានន័យថា ប្រទេស ទ្រីនីដាដ និងតូបាហ្គោ, (រាជធានី/​រដ្ឋធានី) ព័រអេស៉្បាញ។

ទ្រាំ​តែ

?ថ្នាក់ពាក្យជា និបាតសព្ទ
មានន័យថា អត់​ធ្មត់​រង់ចាំ​កំណត់​ត្រឹម​ពេល​ណា​មួយ ដែល​ប្រព្រឹត្ត​ទៅ​បាន ។
ឧទាហរណ៍៖ ការងារ​នេះ​អ្នក​កុំ​អាល​ធ្វើ​ទ្រាំ​តែ​ខ្ញុំ​មក​វិញ សឹម​ធ្វើ​ទាំង​អស់​គ្នា ។

ទ្រាំទ្រឹស្តិ

?ថ្នាក់ពាក្យជា កិរិយាសព្ទ
មានន័យថា ក្រអឺត​ក្រទម, ដំអក់, ទម្រន់, ក្រាញ​ដោយ​ប្រកាន់​ទិដ្ឋិ​អស្មិ​មានះ; ស្ទាក់​ស្ទើរ, ស្ទើរ​ចង់​ស្ទើរ​ទេ, ទាំង​ទាល់ ។
ឧទាហរណ៍៖ តុលាការ​កោះ​ហៅ ៣ ដង ហើយ គាត់​ចេះ​តែ​ទ្រាំ​ទ្រឹស្ដិ មិន​ព្រម​ចូល​ខ្លួន​ទៅ​សោះ, បើ​មុខ​ជា​នឹង​ខាន​ឲ្យ​គេ​មិន​បាន​ទេ ត្រូវ​ឲ្យ​គេ​ឲ្យ​ហើយ​ទៅ ទ្រាំ​ទ្រឹស្ដិ​ដល់​ណា​ទៀត ?; វា​ធ្វើ​ទ្រាំ​ទ្រឹស្ដិ​មិន​ចង់​ទៅ, ធ្វើ​ការ​ទាំង​ទ្រាំង​ទ្រឹស្ដិ (ម. ព. ទ្រាំ និង ទ្រឹស្ដិ ទៀត​ផង) ។

?ថ្នាក់ពាក្យជាកិរិយាវិសេសន៍

មានន័យថា ក្រអឺត​ក្រទម, ដំអក់, ទម្រន់, ក្រាញ​ដោយ​ប្រកាន់​ទិដ្ឋិ​អស្មិ​មានះ; ស្ទាក់​ស្ទើរ, ស្ទើរ​ចង់​ស្ទើរ​ទេ, ទាំង​ទាល់។
ឧទាហរណ៍៖ តុលាការ​កោះ​ហៅ ៣ ដង ហើយ គាត់​ចេះ​តែ​ទ្រាំ​ទ្រឹស្ដិ មិន​ព្រម​ចូល​ខ្លួន​ទៅ​សោះ, បើ​មុខ​ជា​នឹង​ខាន​ឲ្យ​គេ​មិន​បាន​ទេ ត្រូវ​ឲ្យ​គេ​ឲ្យ​ហើយ​ទៅ ទ្រាំ​ទ្រឹស្ដិ​ដល់​ណា​ទៀត ?; វា​ធ្វើ​ទ្រាំ​ទ្រឹស្ដិ​មិន​ចង់​ទៅ, ធ្វើ​ការ​ទាំង​ទ្រាំង​ទ្រឹស្ដិ (ម. ព. ទ្រាំ និង ទ្រឹស្ដិ ទៀត​ផង) ។

ទ្រាំទ្រ

?ថ្នាក់ពាក្យជា កិរិយាសព្ទ
មានន័យថា ទប់ទល់, គាំពារ, ខំ​អត់ធន់​ពេញ​បន្ទុក, ខំ​ប្រឹង​ទទួល​កិច្ច​គ្រប់​ប្រភេទ ។ ថែ​រក្សា​ជំងឺ​ដោយ​ទទួល​ភារៈ​ពេញ​បន្ទុក ។
ឧទាហរណ៍៖ ម្ដាយ​ធំ​ខ្ញុំ​គាត់​ឥត​កូន​ទេ ប៉ុន្តែ​វេលា​ដែល​គាត់​មាន​ជំងឺ​ធ្ងន់ ក្មួយ​ទាំងអស់​ឈូឆរ​ទ្រាំទ្រ​គាត់​ដូច​ជា​កូន​បង្កើត ។

ទ្រាំង

?ថ្នាក់ពាក្យជា នាមសព្ទ
មានន័យថា ឈ្មោះ​ស្រុក​មួយ​ក្នុង​កម្ពុជ​រដ្ឋ; ឥឡូវ​រួម​ចូល​ក្នុង ខែត្រ​តាកែវ ស្រុក​ទ្រាំង​មាន ២ គឺ ទ្រាំង​ត្រើយ​ឯ​ជើង, ទ្រាំង​ត្រើយ​ត្បូង​ៗ សព្វ​ថ្ងៃ​នេះ​ជា​អាណា​ខេត្ត​កូស័ងស៊ីន រាប់​បញ្ចូល​ក្នុង​ខែត្រ​មាត់​ជ្រូក (ចូដុក) ។
ឈ្មោះ​លលក​មួយ​ប្រភេទ​សម្បុរ​រលើប មាត្រ​តូច​ជាង​លលក​ធម្មតា, មិន​ចេះ​រងាវ​ទេ ចេះ​តែ​បូល ​ឬ​បរ​សូរ​ញាប់​រន្ថាន់ ។
ឧទាហរណ៍៖ លលក​ទ្រាំង ។

                 ឈ្មោះស្រុកមួយក្នុងកម្ពុជរដ្ឋ; ឥឡូវរួមចូលក្នុង ខែត្រតាកែវ ស្រុកទ្រាំងមាន ២ គឺ ទ្រាំងត្រើយឯជើង, ទ្រាំងត្រើយត្បូងៗ សព្វថ្ងៃនេះជាអាណាខេត្តកូស័ងស៊ីន រាប់បញ្ចូលក្នុងខែត្រមាត់ជ្រូក (ចូដុក ) ។ ឈ្មោះលលកមួយប្រភេទសម្បុររលើប មាត្រតូចជាងលលកធម្មតា, មិនចេះរងាវទេ ចេះតែបូលឬបរសូរញាប់រន្ថាន់ លលកទ្រាំង ។ នាមសព្ទ ឈ្មោះតចសារព្រឹក្សមួយប្រភេទ (សន្ដានជ្រែ ) មានធាងវែងៗ មានស្លឹកប្រើការបានច្រើនយ៉ាងគឺ ប្រើការចារសាស្ត្រាហៅថា ស្លឹករឹត; ប្រើការដោយយកទ្រនុងស្លឹកវាច្រៀកធ្វើជាកន្លាស់ដោតខ្ទាស់ស្លឹកខ្ចីៗ សៗ គ្របបន្តិចៗលើគ្នាឲ្យបានជាបន្ទះវែងៗ ធំៗ សម្រាប់ប្រក់ឬបាំងហៅថា ភ្ជល់ (មិនជាប់បានយូរប៉ុន្មានទេ); ទោះត្បាញជាការុងឬសំពៀតជាដើមក៏ហៅថា ភ្ជល់ បានដែរ ; ប្រើចម្រៀកតូចៗត្បាញធ្វើជាក្ដោងទូកហៅថា ទទត់; ទ្រនុងដែលសកយកស្លឹកចេញហៅថា ទ្រនុងរឹត ឬ ឆ្អឹងរឹត; ធាងទុំដែលគេកាប់យកមកពុះហើយច្រាស់ ឬ ឈូសធ្វើជាវត្ថុផ្សេងៗមានដំបង, ដាម, ព័ន្ធមូល (គ្រឿងតម្បាញ) ជាដើម ហៅថា ទ្រាំងដែរ : ដំបងទ្រាំង, ដាមទ្រាំង, ព័ន្ធមូលទ្រាំង ។ ព. ទ. បុ. ទ្រាំងកំដរខ្មោច គេយកធាងទ្រាំងដែលគេធ្វើជាដាមឬជាព័ន្ធមូលនោះមកចងភ្ជាប់ ឬខ្ទាស់នឹងកាំជណ្ដើរផ្ទះ ដោយគេជឿតាមទម្លាប់ថា ខ្មោចបិសាចខ្លាចទ្រាំង គេការពារមិនឲ្យខ្មោចបិសាចឡើងតាមជណ្ដើរចូលក្នុងផ្ទះបាន ។ មនុស្សដែលខ្ជិលណាស់ឬដែលល្ងង់ទុយមុយពេក ពេលយប់ដេកលក់មិនសូវដែលប្រែខ្លួន បានត្រឹមតែមកដេកកំដរ កុំឲ្យតែខ្លាចខ្មោចបិសាចលងប៉ុណ្ណោះ, គេនិយាយថា ដូចគេយកទ្រាំងមកកំដរខ្មោច ។ ដើមទ្រាំងនេះច្រើនដុះពីគ្រាប់វាក្នុងព្រៃធំៗ ក្នុងប្រទេសកម្ពុជា មានក្នុងខែត្រក្រចេះនិងខែត្រកំពង់ធំច្រើនជាងខែត្រឯទៀត, ជាតចសារព្រឹក្សមានប្រយោជន៍ច្រើន, គេអាចដាំតាមព្រំវត្តអារាមក៏បាន មិនសូវរើសដីប៉ុន្មានទេ, រស់នៅបានយូរឆ្នាំ វែងឆ្ងាយជាងអាយុមនុស្សអ្នកមានអាយុវែង, ប៉ុន្តែលុះដល់កំណត់កាល ក៏បញ្ចេញផ្កាចំត្រង់កំពូលមានផ្លែជាធ្លាយដូចផ្លែចាក, លុះផ្លែទុំហើយ តចសារព្រឹក្សនេះក៏ងាប់, រាប់ថាជារុក្ខជាតិបញ្ចេញផ្កាផ្លែសម្លាប់ដើម, សមដូចព្រះពុទ្ធភាសិតថា តចសារជាតិមានឫស្សី, បបុស, ត្រែង, ទ្រាំងជាដើមបញ្ចេញផ្កាផ្លែសម្លាប់ដើមវាយ៉ាងណា, លាភៈសក្ការៈពុំជា សម្លាប់មនុស្សលោភលាមកតក់ម៉ក់អាក្រក់ក្រៃ ក៏មានឧបមេយ្យដូច្នោះដែរ ។
ឧទាហរណ៍៖ ដំបង​ទ្រាំង, ដាម​ទ្រាំង, ព័ន្ធ​មូល​ទ្រាំង ។

                 សារព្រឹក្សមួយប្រភេទ កម្ពស់ ៤-១០ម ដើមមានវិជ្ឈមាត្រ ៥០-៦០ ស.ម ដុះក្នុងព្រៃក្រាស់ល្មមនៃឧបទ្វីបឥណ្ឌូចិន។ ស្លឹកទ្រាំងវែងជាងស្លឹកសារព្រឹក្សឯទៀត។ ធាងវែងដល់ ១២ម ស្លឹកប្រើការពីជំនាន់ដើមសម្រាប់ចារសាស្ត្រា ហៅថាស្លឹករឹត ដោយភិក្ខុសង្ឃ។ សព្វថ្ងៃ មានគ្រូថ្នាំខ្មែរខ្លះៗ និងហោរប្រើស្លឹកទ្រាំងសម្រាប់សរសេរ។ ស្លឹកចាស់ៗ គេប្រើប្រក់ផ្ទះ ធ្វើកន្ទេល ជាដើម។ ធាង ទង ស្លឹក សម្រាប់ធ្វើឈើច្រត់ ព្រួញ ត្រល់។ ផ្លែទ្រាំង អាចបំពុលត្រីបាន។ អ្នកនេសាទគេបាចឱ្យត្រីពុល មុននេសាទវាក្នុងរដូវទឹកសម្រក។

ទ្រាំ

?ថ្នាក់ពាក្យជា កិរិយាសព្ទ
មានន័យថា ខំ​អត់, អត់​ធ្មត់ ។
ឧទាហរណ៍៖ ទ្រាំ​ក្ដៅ, ទ្រាំ​រងា, ទ្រាំ​ធ្វើ​ការ ។

                  ថែ​ជំងឺ, បម្រើ​ជំងឺ ។
ឧទាហរណ៍៖ ទ្រាំ​ជំងឺ ។

ទ្រាសរាជព្កុល

?ថ្នាក់ពាក្យជា នាមសព្ទ
មានន័យថា ព្រឹក្សម្យ៉ាង មានកម្ពស់ ១៥-៣០ម ដុះក្នុងព្រៃជ្រៅនៃប្រទេសថៃ និងកម្ពុជា។ ដើមរឹងអាចប្រើធ្វើសសរផ្ទះបានល្អ ឬធ្វើប្រដាប់ឈើដែលត្រូវការកកិតគ្នា ដូចជាកង់រទេះ ឬត្បាល់កិនជាដើម។ ក្នុងខេត្តពោធិសាត់ គេយកដើមនេះសម្រាប់ព្យាបាលជំងឹបូសរយ។

ទ្រាស

?ថ្នាក់ពាក្យជា នាមសព្ទ
មានន័យថា ឈ្មោះ​ឈើ​មួយ​ប្រភេទ ។
មានជ័រក្រហម កម្ពស់ ១០-២០ម ដុះក្នុងព្រៃស្រោងនៃប្រទេសថៃ និងកម្ពុជាឦសាន។ ដើមមានភាពរឹងណាស់ សម្រាប់ប្រើធ្វើសសរផ្ទះ តែគេមិនសូវកាប់ទេ ពីព្រោះរឹងពេក។

ទ្រាល

?ថ្នាក់ពាក្យជា កិរិយាសព្ទ
មានន័យថា ផ្កាប់ខ្លួនឲ្យដិតដល់ផ្ទៃ ។
ឧទាហរណ៍៖ កុំទ្រាលសរសេរប្រយ័ត្នឈឺទ្រូងខា្លចបណ្ដាលជារោគក្អករបេង។

?ថ្នាក់ពាក្យជា នាមសព្ទ
មានន័យថា អន្លង់តូចៗក្នុងបឹងក្នុងព្រែកសម្រាប់ត្រីនៅ គឺកន្លែងដែលត្រីននៀលទៅមកឲ្យខូង សម្រាប់អាស្រ័យនៅ ។
ឧទាហរណ៍៖ ត្រីវ៉ៃទ្រាល (ហៅតាមទម្លាប់ស្រុក) ។

ទ្រាយ

?ថ្នាក់ពាក្យជា នាមសព្ទ
មានន័យថា គ្រឿងរទេះគោ, រទេះក្របីមានសណ្ឋានងចុងទាំង២ខាង ដាក់ប្រកបត្រង់ខាងមុខខាងក្រោយលើទូករទេះ ទ្រទ្រពង ។
ឧទាហរណ៍៖ ទ្រាយរទេះ ។

                 ឈ្មោះម្រឹគពួកឈ្លូស ។

ទ្រាប់

?ថ្នាក់ពាក្យជា កិរិយាសព្ទ
មានន័យថា រង, កល់ពីក្រោម, ដាក់ទ្រនាប់
ឧទាហរណ៍៖ ទ្រាប់ស្លឹកចេកនៅបាតកញ្ឆេ ។

ទ្រាប

?ថ្នាក់ពាក្យជា កិរិយាសព្ទ
មានន័យថា ផ្កាប់មុខគ្របសង្កត់ពីលើឬសង្កត់ដោយបាតដៃលើកឈ្នក់ដាក់ផ្ទាប់ទៅផ្ទាល់នឹងផ្ទៃភក់ក្នុងទឹក
ឧទាហរណ៍៖ ទ្រាបត្រី ។

?ថ្នាក់ពាក្យជា នាមសព្ទ
មានន័យថា បង្អែម​ធ្វើ​ដោយ​អង្ករ​ដំណើប ឬ​ល្ង ជាដើម លាយ​កូរ​នឹង​ទឹក​ស្ករ​ស្អិត រួច​យក​មក​សង្កត់​ជា​ផែន​ៗ ។
ឧទាហរណ៍៖ ទ្រាប​លាជ, ទ្រាប​ល្ង, ទ្រាប​បាយ ។

ទ្រាន់

?ថ្នាក់ពាក្យជា កិរិយាសព្ទ
មានន័យថា ធុញ​ណាយ​នឹង​អាហារ​ចំណី​ដដែល​ៗ មិន​ចង់​បរិភោគ​ ឬ​ដោយ​ធ្វើ​អ្វី​ៗ​ហួស​កម្លាំង នាំ​ឲ្យ​មាន​ចិត្ត​មិន​ចង់​ធ្វើ​ត​ទៅ​ទៀត ។
ឧទាហរណ៍៖ កុំ​ស្ល​ម្ជូរ​ដដែល​ៗ ខ្ញុំ​ទ្រាន់​ណាស់ ទទួល​ទាន​មិន​កើត​ទេ ។

                ទ្រាន់ចិត្ត ធុញចិត្ត, មានចិត្តធុញទ្រាន់ ។ ទ្រាន់ដៃ គឺរអាដៃនឿយណាយមិនចង់លូកដៃកាន់ការនោះតទៅទៀត ។ល។

ទ្រហោយំ

?ថ្នាក់ពាក្យជា រាជសព្ទ
មានន័យថា ទ្រង់ពិលាប

ទ្រហោ

?ថ្នាក់ពាក្យជា កិរិយាសព្ទ
មានន័យថា ស្រែក​យំ​ខ្លាំង ដូច​គេ​ស្រែក​ហ៊ោ។
ឧទាហរណ៍៖ ទ្រហោ​យំ ។

ទ្រហឹង

?ថ្នាក់ពាក្យជា គុណនាម
មានន័យថា ដែល​មាន​សូរ​ឮ​អឺងកង​នាំ​ឲ្យ​ហឹុង​ត្រចៀក ។
ឧទាហរណ៍៖ ស្រែក​យំ​ទ្រហឹង; សូរ​ទ្រហឹង​អឺងកង ។

?ថ្នាក់ពាក្យជា កិរិយាវិសេសន៍
មានន័យថា ដែល​មាន​សូរ​ឮ​អឺងកង​នាំ​ឲ្យ​ហ៊ឹង​ត្រចៀក។
ឧទាហរណ៍៖ ស្រែក​យំ​ទ្រហឹង; សូរ​ទ្រហឹង​អឺងកង ។

ទ្រហឹង

?ថ្នាក់ពាក្យជា គុណនាម
មានន័យថា ដែល​មាន​សូរ​ឮ​អឺងកង​នាំ​ឲ្យ​ហឹុង​ត្រចៀក ។
ឧទាហរណ៍៖ ស្រែក​យំ​ទ្រហឹង; សូរ​ទ្រហឹង​អឺងកង ។

?ថ្នាក់ពាក្យជា កិរិយាវិសេសន៍
មានន័យថា ដែល​មាន​សូរ​ឮ​អឺងកង​នាំ​ឲ្យ​ហ៊ឹង​ត្រចៀក។
ឧទាហរណ៍៖ ស្រែក​យំ​ទ្រហឹង; សូរ​ទ្រហឹង​អឺងកង ។

ទ្រវះ

?ថ្នាក់ពាក្យជា គុណនាម
មានន័យថា ទូលាយ, ដែល​មាន​រង្វះ​ធំ។
ឧទាហរណ៍៖ មាត់​ទ្រវះ ។

ទ្រវែង

?ថ្នាក់ពាក្យជា គុណនាម
មានន័យថា ដែល​មាន​រាង​វែង។
ឧទាហរណ៍៖ ផ្លែ​ឪឡឹក​រាង​ទ្រវែង, រាង​បួន​ជ្រុង​ទ្រវែង ។

ទ្រវៀច

?ថ្នាក់ពាក្យជា គុណនាម
មានន័យថា ប៉ិនប៉ាន់, រប៉ិនរប៉ាន់, វៀចវ៉ច (ម. ព. គ្រវៀច) ។